მაშინ, როცა დონალდ ტრამპის მიერ მაღალი საბაჟო ტარიფების თავიდან ასაცილებლად დაწესებული საბოლოო ვადა ახლოვდება და აზიელი ინვესტორები სიფრთხილეს იჩენენ, აშშ-ის პრეზიდენტმა განაცხადა, რომ სავაჭრო პარტნიორებისთვის გადასახადების განაკვეთების შესახებ წერილების გაგზავნას დაიწყებს.

მიუხედავად იმისა, რომ აშშ-ის დასაქმების რეკორდულმა ანგარიშმა მსოფლიოს უდიდესი ეკონომიკის შესახებ შეშფოთება შეამსუბუქა, მომდევნო კვირაში დაწესებული საბოლოო ვადის გამო არსებულმა გაურკვევლობამ უოლ სტრიტის პოზიტიურ განწყობას ჩრდილი მიაყენა.

მსოფლიოს მთავრობები ცდილობენ ვაშინგტონთან შეთანხმების მიღწევას 9 ივლისის ვადამდე, რომელიც დაწესდა მას შემდეგ, რაც ტრამპმა აპრილის დასაწყისში გადასახადების ზრდის სერია გამოაცხადა.

მიუხედავად იმისა, რომ ტრამპი და აშშ-ის მაღალჩინოსნები აცხადებენ, რომ რამდენიმე შეთანხმება მომზადების ეტაპზეა, ამ დროისთვის ხელშეკრულება მხოლოდ დიდმა ბრიტანეთმა და ვიეტნამმა გააფორმეს. ჩინეთმა კი ჩარჩო-შეთანხმება მიიღო, რის საპასუხოდაც აშშ საბაჟო ტარიფების შემცირებასა და კონკრეტული პროდუქტების გადაზიდვის დამტკიცებას დათანხმდა.

მაშინ, როცა მომლაპარაკებლები თეთრი სახლის ყველაზე მკაცრი ზომების თავიდან არიდების გზებს ეძებენ, ტრამპმა ხუთშაბათს დედაქალაქები გააფრთხილა, რომ მალე გადასახადების განაკვეთების შესახებ შეტყობინებებს მიიღებენ.

„ვფიქრობ, გავაგზავნო წერილი და ვუთხრა, რა საბაჟო ტარიფს გადაიხდიან,“ — განუცხადა ტრამპმა ჟურნალისტებს და ხაზი გაუსვა, რომ ეს მეთოდი ბევრად მარტივია.

„სავარაუდოდ, ხვალიდან, შესაძლოა დღეში 10-ის ოდენობით, დავიწყებთ სხვადასხვა ქვეყნისთვის წერილების გაგზავნას, სადაც მითითებული იქნება, რა უნდა გადაიხადონ ბიზნესის საკეთებლად,“ — დასძინა ტრამპმა.

იმის ალბათობამ, რომ სავაჭრო პარტნიორები, იაპონიიდან და სამხრეთ კორეიდან დაწყებული, ინდოეთითა და ტაივანით დამთავრებული, მკაცრი ტარიფების წინაშე აღმოჩნდებიან, გლობალურ ეკონომიკასთან დაკავშირებით ახალი შეშფოთება გამოიწვია.

ტოკიოს, შანხაის, სიდნეის, ველინგტონისა და ჯაკარტის საფონდო ბირჟებზე მცირე ზრდა დაფიქსირდა, ხოლო ჰონგ-კონგში, სეულში, სინგაპურში, ტაიბეისა და მანილაში — კლება.

ტრეიდერებმა ვერ გააგრძელეს ნიუ-იორკელი კოლეგების მიერ დაწყებული პოზიტიური ტენდენცია, რომლებმაც დამოუკიდებლობის დღის დღესასწაულამდე S&P 500-ისა და Nasdaq-ის ინდექსები რეკორდულ ნიშნულზე აიყვანეს.

ეს ზრდა მოჰყვა მონაცემებს, რომლებმაც დაადასტურა, რომ აშშ-ის ეკონომიკამ ივნისში 147,000 სამუშაო ადგილი შექმნა, რითაც მოლოდინს გადააჭარბა, ხოლო უმუშევრობის დონე 4,2%-დან 4,1%-მდე შემცირდა, რაც ასევე პროგნოზირებულზე უკეთესი მაჩვენებელია.