The Wall Street Journal-ი (WSJ) ოთხშაბათს ამერიკელ მაღალჩინოსნებზე დაყრდნობით იტყობინებოდა, რომ აშშ-ის პრეზიდენტმა დონალდ ტრამპმა თავის თანაშემწეებს განუცხადა: ის არ შეწყვეტს ირანთან ცეცხლის შეწყვეტის შეთანხმებას თუ თეირანი ამერიკელ ჯარისკაცებს არ მოკლავს.
გავრცელებული ინფორმაციით, ტრამპის სურვილის არ ქონა ირანთან კონფლიქტის ხელახლა გაღვივების მიმართ მიუთითებს იმაზე, რომ ახლო აღმოსავლეთში უფრო ფართო კონფლიქტის თავიდან ასაცილებლად იგი შესაძლოა მზად იყოს „კვირების ან თვეების განმავლობაში უფრო მცირე მასშტაბის შეტაკებების ასატანად“.
მიუხედავად იმისა, რომ აპრილის დასაწყისში ამოქმედებული ცეცხლის შეწყვეტის შეთანხმება ძალაში რჩება, ამ კვირაში აშშ-სა და ირანს შორის ერთ-ერთი ყველაზე ინტენსიური შეტაკებები მოხდა.
ირანმა რეგიონში ამერიკული სამხედრო ბაზებისა და ასევე ქუვეითის საერთაშორისო აეროპორტის მიმართულებით რაკეტები და უპილოტო საფრენი აპარატები გაუშვა; ამ თავდასხმების შედეგად ერთი ადამიანი დაიღუპა.
აშშ-მა და ისრაელმა 28 თებერვალს ირანზე თავდასხმები დაიწყეს, რასაც მოჰყვა ირანის საპასუხო დარტყმები ისრაელისა და ყურის ქვეყნებში აშშ-ის მოკავშირეების წინააღმდეგ. ირანმა ასევე სცადა სტრატეგიული ჰორმუზის სრუტის ჩაკეტვა. აპრილის დასაწყისში მიღწეულ იქნა ცეცხლის შეწყვეტის შეთანხმება, თუმცა აშშ-მა ირანის პორტებს საზღვაო ბლოკადა დაუწესა.
დავამ ჰორმუზის სრუტეზე კონტროლის შესახებ შეარყია გლობალური ენერგეტიკული ბაზრები და სერიოზულად შეაფერხა საერთაშორისო ნაოსნობა. სანამ თეირანი ზღუდავდა კომერციულ გადაზიდვებს სტრატეგიულ საზღვაო გზაზე, ვაშინგტონმა ირანის პორტებს მკაცრი ბლოკადა დაუწესა.
აშშ-ის სახელმწიფო მდივანმა მარკო რუბიომ ორმხრივი თავდასხმები შეაფასა არა როგორც სრულმასშტაბიან კონფლიქტში გადასვლა, არამედ როგორც თავდაცვითი ზომები.
ოთხშაბათს, წარმომადგენელთა პალატის სხდომაზე რუბიომ განაცხადა: „თავდასხმები ირანის ქმედებების საპასუხოდ ხორციელდება... თუ ისინი იმ გემებს არ ესვრიან, არც ჩვენ ვისვრით, მაგრამ იძულებულნი ვართ ვუპასუხოთ“.
ამასთან ერთად, WSJ-მ აღნიშნა, რომ განმეორებითი თავდასხმები „ზრდის ზეწოლას ტრამპზე და ეჭვქვეშ აყენებს ცეცხლის შეწყვეტის შეთანხმების გრძელვადიან სიცოცხლისუნარიანობას“.
ტრამპმა არაერთხელ განაცხადა, რომ ძალიან ახლოს არის ომის დასრულების შესახებ შეთანხმების ხელმოწერასთან, რომელიც სრუტეს კვლავ გახსნის, მოახდენს ირანის ბირთვული პროგრამის ლიკვიდაციას და ქვეყანაში გამდიდრებული ურანის მარაგებს გაანადგურებს.
