პალესტინელმა ფოტოგრაფმა საჰერ ალღორამ ღაზაში ჰუმანიტარული კრიზისის ამსახველი შთამბეჭდავი ნამუშევრებისთვის 2026 წლის პულიცერის პრემია მოიპოვა.
ალღორა, რომელიც „ნიუ-იორკ თაიმსთან“ თანამშრომლობს, ჯილდოზე წარდგენილ იქნა ნამუშევრების სერიისთვის, რომლებიც პულიცერის პრემიის ადმინისტრატორმა მარჯორი მილერმა „შთამბეჭდავად“ და „ფაქიზად“ დაახასიათა.
ალღორას ფოტოები ასახავს შიმშილსა და ნგრევას, რომელიც 2023 წლის ოქტომბრიდან მოყოლებული ღაზაში ისრაელის მიერ განხორციელებულმა ქმედებებმა გამოიწვია.
მილერმა ხაზი გაუსვა დამოუკიდებელი ჟურნალისტიკის მნიშვნელობას მზარდი დაბრკოლებების ფონზე.
პულიცერის პრემიის გარდა, ალღორამ ოქტომბერში საფრანგეთში გამართულ 32-ე Prix Bayeux-Calvados-Normandie-ზე ომის ფოტოგრაფიის კატეგორიაში პირველი ადგილი დაიკავა.
ალღორას ჯილდოს მფლობელმა ნამუშევარმა, სახელწოდებით „ხაფანგში მოქცეული ღაზა: ცეცხლსა და შიმშილს შორის“, აჩვენა ალყაში მოქცეული ცხოვრების რეალობა და იმ სამოქალაქო პირების მდგომარეობა, რომლებიც დაბომბვასა და შიმშილს შორის აღმოჩდნენ.
საგამოძიებო და ეროვნული რეპორტაჟი
სააგენტო „როიტერმა“ კი ეროვნული რეპორტაჟის კატეგორიაში გაიმარჯვა მთავრობების მიერ საკუთარი გავლენის გამოყენების დოკუმენტირებისთვის.
ამასთანავე, „როიტერის“ ჟურნალისტებმა, ჯეფ ჰორვიცმა და ენგენ თამმა, მოიპოვეს ჯილდო დარგობრივი რეპორტაჟის კატეგორიაში იმ როლის გამოაშკარავებისთვის, რომელსაც კომპანია Meta მომხმარებლების „თაღლითობისა და ხელოვნური ინტელექტის მანიპულაციის“ საფრთხის წინაშე დაყენებაში ასრულებდა.
საზოგადოებრივი სამსახურის კატეგორიაში „ვაშინგტონ პოსტმა“ მიიღო ჯილდო ფედერალური უწყებების „ქაოსური რესტრუქტურიზაციის“ შესახებ მომზადებული მასალებისთვის.
„მაიამი ჰერალდის“ ჟურნალისტ ჯული კ. ბრაუნს გადაეცა სპეციალური სიგელი ჯეფრი ეპშტეინის მიერ განხორციელებული სისტემატური ძალადობის გამოსავლენად გაწეული დაჟინებული ძალისხმევისთვის.
