თურქეთის პრეზიდენტმა რეჯეფ თაიფ ერდოღანმა პარასკევს, მუსლიმთა წმინდა დღესასწაულთან, ყურბან ბაირამთან დაკავშირებით, მოსალოცი გზავნილი გაავრცელა.

პლატფორმა X-ზე გამოქვეყნებულ პოსტში ერდოღანმა გამოთქვა იმედი, რომ დღესასწაული "სიკეთის მომტანი იქნება ჩვენი ქვეყნისთვის, ჩვენი ერისთვის და მთელი კაცობრიობისთვის".

პრეზიდენტმა დღესასწაული მიულოცა თურქეთის რესპუბლიკის ყველა მოქალაქეს, ასევე "ღაზისა და პალესტინის ყველა ჩვენს მეგობარს".

ყურბან ბაირამი ისლამში აღინიშნება იმის მოსაგონებლად, თუ როგორ იყო წმ. აბრაამი მზად, ღვთის ბრძანებით შეეწირა თავისი ვაჟი, და ასევე ღვთაებრივი ჩარევა, რომლის შედეგადაც საბოლოოდ მოხდა ცხვრის შეწირვა.

მუსლიმები ამ ჩარევის აღსანიშნავად მსხვერპლად სწირავენ ცხოველებს და მათ ხორცს უზიარებენ შეჭირვებულებსა და ნათესავებს.

დაახლოებით 2 მილიონი მომლოცველი ყურბან ბაირამის პირველ დღეს ჰაჯის რიტუალებს ასრულებს.

დაახლოებით ორმა მილიონმა მუსლიმმა მომლოცველმა პარასკევს დილით დაიწყო ჯემარათის სვეტებისთვის ქვების სროლის რიტუალი მინას რაიონში, დასავლეთ საუდის არაბეთში, რომელიც ყოველწლიური ჰაჯის მომლოცველების ერთ-ერთი მნიშვნელოვანი რიტუალია.

ჯემარათ-ულ აქაბასთვის ქვების სროლის დასრულების შემდეგ, მომლოცველები გააგრძელებენ სხვა სადღესასწაულო რიტუალებს, მაგალითად, მსხვერპლშეწირვის რიტუალს, რაც ოთხდღიანი ყურბან ბაირამის დასაწყისს განასახიერებს.

მომლოცველები მინაში დარჩებიან თაშრიქის დღეების განმავლობაში (შაბათიდან ორშაბათამდე) და გააგრძელებენ ქვების სროლის რიტუალს.

საუდის არაბეთის ხელისუფლებამ ხუთშაბათს გამოაცხადა, რომ მომლოცველთა წარმატებით გადაყვანა მოხდა არაფათის მთაზე, რაშიც გამოყენებული იყო ხელოვნური ინტელექტის მოწინავე სისტემები.

ექვსდღიანი ჰაჯის სეზონი ოთხშაბათს დაიწყო და ბოლო რიტუალები ორშაბათამდე გაგრძელდება.

საუდის არაბეთის სტატისტიკის გენერალურმა ორგანიზაციამ განაცხადა, რომ 1446 ჰიჯრის კალენდარული წლისთვის ჰაჯზე მომლოცველთა რაოდენობა შეადგენს 1 673 230-ს, საიდანაც 1 506 576 უცხოეთიდანაა ჩასული.

ადგილობრივი მომლოცველების, ანუ საუდის არაბეთის მოქალაქეებისა და რეზიდენტების რაოდენობა კი 166 654-ია.

გასულ წელს მსოფლიოს 200 ქვეყნიდან 1,8 მილიონზე მეტმა მუსლიმმა მომლოცველმა შეასრულა ჰაჯი.

ჰაჯი ისლამის ხუთი ბურჯიდან ერთ-ერთია და არის თაყვანისცემის ფორმა, რომელიც ფინანსურად შეძლებულმა ყველა მუსლიმმა სიცოცხლეში ერთხელ მაინც უნდა შეასრულოს.

ჰაჯი მოიცავს რიტუალების სერიას, რომელიც მიზნად ისახავს ისლამის ძირითადი ცნებების განმარტებას და წინასწარმეტყველ აბრაამისა და მისი ოჯახის მიერ განცდილი სირთულეების გახსენებას."