სამშაბათს The Wall Street Journal-ში გამოქვეყნებული ინფორმაციის თანახმად, აშშ-ის პრეზიდენტმა დონალდ ტრამპმა თანაშემწეებს ირანის წინააღმდეგ გაფართოებული ბლოკადისთვის მზადების დაწყება დაავალა.
ამერიკელ მაღალჩინოსნებზე დაყრდნობით გამოცემა წერს, რომ ბოლო შეხვედრებზე ტრამპმა უპირატესობა გემების მიმოსვლის შეფერხების გზით ირანის ეკონომიკასა და ნავთობის ექსპორტზე ზეწოლის გაგრძელებას მიანიჭა.
ინფორმაციის თანახმად, ოფიციალურმა პირებმა აღნიშნეს, რომ ტრამპი სხვა ვარიანტებს — დაბომბვის განახლებას ან კონფლიქტიდან გამოსვლას — ბლოკადის გაგრძელებაზე უფრო რისკიანად მიიჩნევს.
28 თებერვალს აშშ-მა და ისრაელმა ირანის წინააღმდეგ ერთობლივი ოპერაცია დაიწყეს, რასაც თეირანმა რეგიონში — ძირითადად ყურის ქვეყნებში — აშშ-ის ინტერესების წინააღმდეგ მიმართული თავდასხმებით უპასუხა.
8 აპრილს პაკისტანის შუამავლობით ცეცხლის შეწყვეტა გამოცხადდა; ამას 11-12 აპრილს ისლამაბადში გამართული შეხვედრები მოჰყვა, თუმცა მოლაპარაკებები შეთანხმებით არ დასრულებულა.
მოგვიანებით ტრამპმა განაცხადა, რომ პაკისტანის თხოვნით, ცეცხლის შეწყვეტის რეჟიმი თეირანისგან წინადადების მიღებამდე გახანგრძლივდა.
ორშაბათს გაკეთებულ განცხადებაში კი ტრამპმა აღნიშნა, რომ ნაკლებად სავარაუდოა დათანხმდეს თეირანის ბოლო შეთავაზებას, რომელიც „ჰორმუზის სრუტის ხელახლა გახსნას ითვალისწინებს, ხოლო ბირთვულ პროგრამასთან დაკავშირებულ კითხვებს სამომავლო მოლაპარაკებებისთვის ტოვებს“.
