მოსალოდნელია, რომ ძლიერი ზამთრის შტორმი ამ კვირაში ამერიკის შეერთებული შტატების ვრცელ ტერიტორიას დაატყდება თავს; ვარაუდობენ, რომ 175 მილიონზე მეტი ადამიანი აღმოჩნდება ძლიერი თოვლის, სახიფათო მოყინვის, ელექტროენერგიის გათიშვისა და მგზავრობის საყოველთაო შეფერხების რისკის ქვეშ.
სინოპტიკოსების განცხადებით, ზამთრის შტორმი „ფერნი“ (Fern) დაახლოებით 3 200 კილომეტრზე გავრცელდება და მოიცავს ვრცელ არეალს ტეხასიდან და დიდი ვაკეებიდან შუა ატლანტიკურ და ჩრდილო-აღმოსავლეთ შტატებამდე. ვარაუდობენ, რომ შტორმი ამერიკის კონტინენტის ნახევარზე მეტს მოიცავს.
მოსალოდნელია, რომ შტორმი პიკს ხუთშაბათს და პარასკევს მიაღწევს.
მეტეოროლოგები აფრთხილებენ მოსახლეობას, რომ შუა ატლანტიკური რეგიონის ზოგიერთ ნაწილში თოვლის საფარმა შესაძლოა 30 სანტიმეტრს გადააჭარბოს. ვარაუდობენ, რომ ვირჯინიისა და მერილენდის შტატები ყველაზე მეტად დაზარალებულ რეგიონებს შორის იქნება, რადგან არქტიკული ცივი ჰაერის მასები სამხრეთისკენ გადაადგილდება.
ამინდის პროგნოზირების სამსახურები ასევე იძლევიან გაფრთხილებას ძლიერი მოყინვის შესახებ, რამაც შესაძლოა დააზიანოს ელექტროგადამცემი ხაზები და ხეები.
ნიუ-იორკში თოვლის საფარის 30 სანტიმეტრამდე მიღწევას პროგნოზირებენ.
ქალაქმა ზამთრის ყველაზე დაბალი ტემპერატურა უკვე გამოსცადა; ეროვნულმა მეტეოროლოგიურმა სამსახურმა ცენტრალურ პარკში მინუს ცხრა გრადუსი დააფიქსირა, თუმცა ქარის ზემოქმედებით ტემპერატურა გაცილებით დაბალი იგრძნობოდა.
ყინვა ვრცელდება
ეროვნული მეტეოროლოგიური სამსახურის განცხადებით, არქტიკული სიცივე ქვეყნის აღმოსავლეთ ნაწილის ორ მესამედს მოიცავს და ყინვას მოიტანს.
„ნულს ქვემოთ და ერთნიშნა ციფრებამდე დაცემული ტემპერატურა ჩრდილოეთ ვაკეებიდან ოჰაიოს ველამდე და ჩრდილო-აღმოსავლეთამდე გავრცელდება“, — ნათქვამია განცხადებაში. გაფრთხილების თანახმად, ქარის ზემოქმედებით, ჩრდილოეთ ვაკეების ზოგიერთ რაიონში ტემპერატურა შესაძლოა მინუს 46 გრადუსზე დაბალი იგრძნობოდეს.
მეტეოროლოგები აღნიშნავენ, რომ შტორმის სიმძლავრეს განაპირობებს უკიდურესად ცივი არქტიკული ჰაერის მასებისა და მექსიკის ყურედან წამოსული ტენიანობის შეჯახება; ეს წარმოქმნის „დიდ ზამთრის შტორმს“, რომელსაც შეუძლია გამოიწვიოს ძლიერი თოვლი და სახიფათო მოყინვა.
მოსალოდნელია, რომ მგზავრობის შეფერხებები განსაკუთრებით მწვავე იქნება სამხრეთ შტატებში, სადაც თოვლის საწმენდი ტექნიკა შეზღუდული რაოდენობითაა.
ოფიციალური პირები აფრთხილებენ მოსახლეობას, რომ დაბალი ტემპერატურის შენარჩუნების გამო, ყინული შესაძლოა რამდენიმე დღის განმავლობაში არ დადნეს.
მიჩიგანში საგზაო სამსახურებმა განაცხადეს, რომ ამ სეზონზე განმეორებითი ზამთრის შტორმების გამო მარილის დეფიციტია.
სხვა რეგიონებში საგანგებო სიტუაციების სამსახურები მოუწოდებენ მცხოვრებლებს, შეზღუდონ გადაადგილება, მოემზადონ ელექტროენერგიის შესაძლო გათიშვისთვის და თვალი ადევნონ ადგილობრივ გაფრთხილებებს.
სინოპტიკოსების თქმით, თოვლისა და ყინულის ზუსტი რაოდენობა ჯერჯერობით გაურკვეველია, თუმცა შტორმს აქვს პოტენციალი, ქვეყნის დიდ ნაწილში ხანგრძლივი შეფერხებები გამოიწვიოს.
