„ვენესუელის პრეზიდენტმა ნიკოლას მადურომ დაადასტურა, რომ ათი დღის წინ აშშ-ის პრეზიდენტ დონალდ ტრამპთან ლათინურ ამერიკაში ამერიკული სამხედრო ძალების თავმოყრასთან დაკავშირებით „გულწრფელი“ სატელეფონო საუბარი გამართა.

ოთხშაბათს სახელმწიფო ტელევიზიისთვის მიცემულ ინტერვიუში მადურომ განაცხადა: „ვესაუბრე ამერიკის შეერთებული შტატების პრეზიდენტ დონალდ ტრამპს. შემიძლია ვთქვა, რომ საუბარი პატივისცემის ფარგლებში და გულწრფელიც კი იყო. თუ ეს საუბარი ნიშნავს სახელმწიფოებსა და ქვეყნებს შორის პატივისცემაზე დამყარებული დიალოგისკენ გადადგმულ ნაბიჯებს, ჩვენ მივესალმებით დიალოგსა და დიპლომატიას, რადგან ჩვენ ყოველთვის მშვიდობისკენ ვისწრაფვით.“

აგვისტოდან მოყოლებული, შეერთებულმა შტატებმა ნარკოვაჭრობასთან ბრძოლის საბაბით კარიბის ზღვის აუზში საბრძოლო გემების ფლოტი და მსოფლიოში უდიდესი ავიამზიდი განათავსა, ხოლო სულ მცირე 22 ნავზე განხორციელებული მომაკვდინებელი თავდასხმების შედეგად მინიმუმ 83 ადამიანი დაიღუპა.

მადურომ კი განაცხადა, რომ ოპერაცია მისი მემარცხენე მთავრობის დასამხობად და საბოლოოდ, ქვეყნის ნავთობის დიდი მარაგების ხელში ჩასაგდებად ხორციელდება.

ტრამპმა დაადასტურა, რომ კვირას ტელეფონით ესაუბრა მადუროს, თუმცა დეტალები არ გაუმჟღავნებია.

როდესაც ტრამპს განმარტება სთხოვეს მას შემდეგ, რაც გავრცელდა ინფორმაცია, რომ სატელეფონო საუბრისას განიხილებოდა შესაძლო შეხვედრა ან ამნისტიის პირობები, თუ მადურო გადადგება, მან უპასუხა: „ვერ ვიტყვი, რომ ეს კარგი იყო თუ ცუდი. ეს იყო სატელეფონო საუბარი“.

ვაშინგტონმა მადურო ე.წ. „მზის კარტელის“ ლიდერობაში დაადანაშაულა და 24 ნოემბერს აღნიშნული სტრუქტურა ტერორისტულ ორგანიზაციად გამოაცხადა. გარდა ამისა, გავრცელდა ინფორმაცია, რომ ინფორმაციისთვის, რომელიც მადუროს დაკავებას შეუწყობს ხელს, ჯილდოდ 50 მილიონი დოლარი დაწესდა.“