თურქეთის რესპუბლიკის პრეზიდენტმა აღნიშნა, რომ ირანში სამოქალაქო მსხვერპლის გამო დიდ მწუხარებას განიცდის და დასძინა, რომ მშვიდობის დამყარების ხელშესაწყობად გააქტიურდება დიპლომატიური ძალისხმევა ცეცხლის შეწყვეტის მიზნით.
ორშაბათს, დედაქალაქ ანკარაში გამართულ ღონისძიებაზე გამოსვლისას, პრეზიდენტმა თქვა: „როგორც მეზობლები და ძმები, ჩვენ ვიზიარებთ ირანელი ხალხის ტკივილს. როგორც ყველა ომში, აქაც დიდ მწუხარებას გვგვრის იმ ტანჯვის დანახვა, რომლის მთელ სიმძიმესაც სამოქალაქო პირები და ყოველგვარი ცოდვის გარეშე მყოფი უდანაშაულო ჩვილები განიცდიან“.
ერდოღანმა აღნიშნა, რომ თურქეთი გააძლიერებს კონტაქტებს ყველა დონეზე, სანამ რეგიონში ცეცხლის შეწყვეტა და სიმშვიდე არ აღდგება.
ერდოღანმა გაიხსენა, რომ შაბათის შემდეგ ბევრ ლიდერთან გამართა ყოვლისმომცველი მოლაპარაკებები მიმდინარე პროცესებთან დაკავშირებით: „ჩვენ მშვიდობის მხარეს ვართ. გვსურს, რომ სისხლი აღარ დაიღვაროს, ცრემლები შეშრეს და ჩვენმა რეგიონმა საბოლოოდ ჰპოვოს ის მუდმივი სიმშვიდე, რომელსაც წლებია ნატრობს“.
პრეზიდენტმა ხაზი გაუსვა, რომ თურქეთის პრიორიტეტი ცეცხლის შეწყვეტა და დიალოგის კარის გაღებაა: „თუ საჭირო ჩარევა არ მოხდება, კონფლიქტის პროცესს სერიოზული შედეგები ექნება რეგიონული და გლობალური უსაფრთხოებისთვის. ასეთი პროცესით გამოწვეულ ეკონომიკურ და გეოპოლიტიკურ გაურკვევლობას კი ვერავინ გაუძლებს. ამიტომ, ხანძარი მანამ უნდა ჩაქრეს, სანამ კიდევ უფრო გაიზრდება“.
სატელეფონო საუბარი ნატოს გენერალურ მდივანთან
ირანზე განხორციელებული თავდასხმებისა და დაწყებული კონფლიქტების შემდეგ, ერდოღანმა სატელეფონო საუბარი გამართა ნატოს გენერალურ მდივანთან, მარკ რუტესთან.
თურქეთის რესპუბლიკის პრეზიდენტის ადმინისტრაციის კომუნიკაციების სამმართველოს განცხადებით, ერდოღანმა რუტეს განუცხადა, რომ თურქეთი „ფხიზლად ადევნებს თვალს რეგიონში კონფლიქტურ პროცესს“ და რომ „მნიშვნელოვანია დიპლომატიას მიეცეს შანსი მუდმივი და მდგრადი მშვიდობის მისაღწევად“.
პრეზიდენტმა ერდოღანმა ასევე აღნიშნა, რომ ანკარაში დაგეგმილი ნატოს ლიდერების სამიტისთვის მზადება გრძელდება და „თურქეთი სამიტს ღირსეულად უმასპინძლებს“.
რუტემ კი განაცხადა, რომ ნატო გააგრძელებს წვლილის შეტანას „მოკავშირეების უსაფრთხოების უზრუნველყოფაში 360-გრადუსიანი ხედვით“.
შაბათს აშშ-მა და ისრაელმა ირანზე ფართომასშტაბიანი თავდასხმა დაიწყეს, რის შედეგადაც დაიღუპა მრავალი ირანელი ოფიციალური პირი, მათ შორის უზენაესი ლიდერი ალი ხამენეი.
თეირანმა საპასუხოდ გამოიყენა უპილოტო საფრენი აპარატები და სარაკეტო დარტყმები ყურის ქვეყნებში მდებარე აშშ-თან დაკავშირებულ ობიექტებზე, რამაც მრავალი ადამიანის სიცოცხლე იმსხვერპლა. დაიღუპა აშშ-ის 6 სამხედრო მოსამსახურე, ზოგიერთი კი მძიმედ დაიჭრა.
ირანის „წითელი ნახევარმთვარის ორგანიზაციის“ ცნობით, შაბათის შემდეგ აშშ-ისრაელის საჰაერო დარტყმების შედეგად დაღუპულთა რიცხვი 555-მდე გაიზარდა.
