სამშაბათს ევროკავშირმა გამოაცხადა, რომ იწყებს მოკვლევას იმის შესაფასებლად, იყენებდა თუ არა კომპანია Google მედიისა და სხვა გამომცემლების მიერ ონლაინ გამოქვეყნებულ მასალებს ხელოვნური ინტელექტის სერვისების გასაწვრთნელად სათანადო კომპენსაციის გადახდის გარეშე.

ევროკომისიის განცხადებით, გამოძიება შეისწავლის შეშფოთებას იმის შესახებ, არღვევს თუ არა ამერიკული ტექნოლოგიური გიგანტი კონკურენციას გამომცემლებისა და კონტენტის შემქმნელებისთვის უსამართლო პირობების დაწესებით ან მათ მონაცემებზე პრივილეგირებული წვდომის უზრუნველყოფით.

„თავისუფალი და დემოკრატიული საზოგადოება ეფუძნება მრავალფეროვან მედიას, ინფორმაციაზე ღია წვდომასა და ცოცხალ შემოქმედებით გარემოს“, - განაცხადა ევროკავშირის კონკურენციის საკითხებში პასუხისმგებელმა პირმა, ტერეზა რიბერამ.

„ხელოვნურ ინტელექტს ევროპის მასშტაბით ხალხისა და ბიზნესისთვის არაჩვეულებრივი ინოვაციები და მრავალი სარგებელი მოაქვს, თუმცა ეს პროგრესი ჩვენი საზოგადოების ფუნდამენტური პრინციპების ხარჯზე არ უნდა ხდებოდეს“, - დასძინა მან.

ევროკავშირის კონკურენციის მარეგულირებელმა კომისიამ აღნიშნა, რომ გამოძიება ორ ძირითად საკითხზე იქნება ფოკუსირებული.

გამოძიება შეისწავლის, იყენებს თუ არა Google YouTube-ზე განთავსებულ ვიდეოებსა და კლიპებს ხელოვნური ინტელექტის მოდელების გასაწვრთნელად ისე, რომ კონტენტის მფლობელებს არ უხდის საჭირო თანხას და არ აძლევს შესაძლებლობას, უარი თქვან მათი მასალების ხელოვნური ინტელექტის მიერ დამუშავებაზე.

„Google YouTube-ის კონტენტის შემქმნელებს არ უხდის საფასურს, ასევე, YouTube-ზე მასალების ატვირთვის უფლების მიცემის პარალელურად, არ აძლევს მათ საშუალებას, აკრძალონ Google-ის მიერ ამ მონაცემების გამოყენება“, - განაცხადა კომისიამ.

„ამავდროულად, YouTube-ის პოლიტიკის გამო, ხელოვნური ინტელექტის მოდელების კონკურენტ შემქმნელებს ეკრძალებათ YouTube-ის კონტენტის გამოყენება საკუთარი მოდელების გასაწვრთნელად“.

გამოძიება ასევე შეამოწმებს, იყენებს თუ არა კომპანია სხვა ონლაინ რესურსების, მაგალითად გაზეთების ვებგვერდების კონტენტს გენერაციული ხელოვნური ინტელექტის სერვისების მისაწოდებლად ისე, რომ არ გასცემს კომპენსაციას და არ იძლევა უარის თქმის საშუალებას.

მოკვლევა, განსაკუთრებით ეხება ხელოვნური ინტელექტის მიერ გენერირებულ რეზიუმეებს, რომლებიც მომხმარებლის საძიებო მოთხოვნის საპასუხოდ ჩნდება და „AI Mode“-ს - ჩატბოტის მსგავს საძიებო ჩანართს, რომელიც მომხმარებლის კითხვებს პასუხობს.

„ჩვენ ვიკვლევთ, აწესებს თუ არა Google უსამართლო პირობებს გამომცემლებისა და კონტენტის შემქმნელებისთვის, აყენებს თუ არა არახელსაყრელ მდგომარეობაში ხელოვნური ინტელექტის მოდელების კონკურენტ შემქმნელებს და ირღვევა თუ არა ევროკავშირის კონკურენციის წესები“, - განაცხადა რიბერამ.

კომისიას გამოძიების დასასრულებლად კონკრეტული ვადა არ აქვს და გამოძიების დაწყება შედეგის წინასწარ განსაზღვრას არ ნიშნავს. თუმცა, არსებობს რისკი, რომ კომპანიას სოლიდური ფულადი ჯარიმა დაეკისროს.