ორშაბათს გამოქვეყნებული სასამართლო ჩანაწერების თანახმად, თურქეთის ერთ-ერთი სახელმწიფო ბანკი, ჰალკბანკი (Halkbank) და აშშ-ის იუსტიციის დეპარტამენტი შეთანხმდნენ გადავადების ხელშეკრულებაზე, რომელიც მათ შორის არსებულ დავას დაასრულებს.
ნიუ-იორკის სამხრეთ ოლქის პროკურორმა, ჯეი კლეიტონმა, აშშ-ის საოლქო სასამართლოს მოსამართლე რიჩარდ ბერმანისთვის გაგზავნილ წერილში აღნიშნა, რომ იუსტიციის დეპარტამენტს სჯერა, რომ „შეთანხმებაში მითითებული პირობების ფარგლებში ჰალკბანკის წინააღმდეგ არსებული ბრალდებების მოგვარება სრულად შეესაბამება ამერიკის შეერთებული შტატების ინტერესებს“.
აშშ-ის პროკურორმა დაწერა: „ჰალკბანკთან დადებული ეს შეთანხმება კიდევ უფრო აძლიერებს აშშ-ის ინტერესებს ტერორიზმის დაფინანსებისა და ირანის მთავრობისთვის ფინანსური მხარდაჭერის აღმოფხვრის წინააღმდეგ ბრძოლაში“.
„ამიტომ, ეს შეთანხმება სრულად შეესაბამება საზოგადოებრივ ინტერესებს. ხელშეკრულებით მიღწეული ეროვნული უსაფრთხოებისა და საგარეო პოლიტიკის ინტერესები უნიკალური და არაჩვეულებრივია“, - დასძინა პროკურორმა და ხაზი გაუსვა თურქეთის დიპლომატიურ ძალისხმევას, რომელმაც ხელი შეუწყო ღაზაში ისრაელელი მძევლების გათავისუფლებასა და ომით განადგურებულ პალესტინაში 2025 წლის ზავის დამყარებას.
იუსტიციის დეპარტამენტის განცხადებით, შეთანხმების თანახმად, ჰალკბანკი ითანამშრომლებს მესამე მხარესთან სანქციებისა და ფულის გათეთრების წინააღმდეგ ბრძოლის შესაბამისობის (compliance) ძალისხმევის შესამოწმებლად.
კლეიტონმა ასევე აღნიშნა, რომ მოგვიანებით მომზადებული ანგარიში წარედგინება ხაზინის დეპარტამენტის უცხოური აქტივების კონტროლის სამმართველოს (OFAC) და აშშ-ის პროკურატურას „განახლებულ საბრალდებო დასკვნაში მითითებული დანაშაულებრივი ქმედებების გამოსასწორებლად“.
შეთანხმება სასამართლომ უნდა დაამტკიცოს. მოსამართლე ბერმანის განცხადებით, საკითხს ოთხშაბათს დაგეგმილ სხდომაზე განიხილავენ.
დანაშაულის აღიარებისა და ფულადი ჯარიმის გარეშე
თურქეთის საჯარო ინფორმაციის პლატფორმაზე (KAP) გამოქვეყნებულ განცხადებაში ნათქვამია, რომ ნიუ-იორკის სამხრეთ ოლქის პროკურატურასთან მიღწეული შეთანხმების თანახმად, ჰალკბანკი არ აღიარებს არანაირ სისხლისსამართლებრივ დანაშაულს და მას არ დაეკისრება არანაირი სასამართლო თუ ადმინისტრაციული ჯარიმა.
განცხადებაში ნათქვამია: „მას შემდეგ, რაც ექსპერტული ორგანიზაციის მიერ მომზადებული შესაბამისობის ანგარიში წარედგინება აშშ-ის ხაზინის დეპარტამენტის უცხოური აქტივების კონტროლის სამმართველოს (OFAC), ხოლო მისი ასლი - ნიუ-იორკის სამხრეთ ოლქის პროკურატურას, ჰალკბანკი და პროკურატურა ერთობლივი განცხადებით მიმართავენ სასამართლოს საქმის შეწყვეტის შესახებ“.
მას შემდეგ, რაც სასამართლო დაამტკიცებს საქმის შეწყვეტას, აშშ-ში ბანკის წინააღმდეგ თითქმის ცხრა წლის განმავლობაში მიმდინარე სისხლისსამართლებრივი პროცესი საბოლოოდ დასრულდება.
უცხოური აქტივების კონტროლის სამმართველომ (OFAC) ასევე აცნობა ბანკს, რომ ადმინისტრაციული შემოწმება ყოველგვარი შემდგომი ზომების მიღების გარეშე დაიხურა.
ჰალკბანკის განცხადებით, ამ მოვლენის შედეგად მოსალოდნელია ბანკის ფინანსური მდგომარეობის გაუმჯობესება საზღვარგარეთიდან რესურსების მოზიდვის, საკორესპონდენტო ქსელისა და საერთაშორისო ბაზრებზე წვდომის გაფართოების გზით.
„ჩვენი ბანკი, რომელიც უკვე 88 წელია ემსახურება ჩვენი ქვეყნის ეკონომიკას, კვლავაც გააგრძელებს საქმიანობას ყველა ეროვნული და საერთაშორისო რეგულაციის შესაბამისად, მტკიცედ, საიმედოდ და შეუფერხებლად. ჩვენ კვლავ შევიტანთ წვლილს როგორც საბანკო სექტორის, ისე ქვეყნის ეკონომიკის ზრდაში“, - ნათქვამია განცხადებაში.
