ამერიკის შეერთებული შტატების პრეზიდენტმა დონალდ ტრამპმა კვირას განაცხადა, რომ ირანის წარმომადგენლები დაუკავშირდნენ აშშ-ს ქვეყნის ბირთვული პროგრამის შესახებ შესაძლო მოლაპარაკებების განსახილველად, რაც მზარდი დაძაბულობის ფონზე პოტენციური დიპლომატიური წინსვლის სიგნალია.
ფლორიდიდან ვაშინგტონში მგზავრობისას, პრეზიდენტის თვითმფრინავში (Air Force One) ჟურნალისტებთან საუბრისას ტრამპმა აღნიშნა, რომ ირანელი მაღალჩინოსნები მათ შაბათს დაუკავშირდნენ და მოლაპარაკებები მოითხოვეს.
„გუშინ დაგვირეკეს. ირანმა გუშინ მოლაპარაკებების დასაწყებად დარეკა,“ - თქვა მან.
„ვფიქრობ, მათ მობეზრდათ აშშ-ის მხრიდან მუდმივი შევიწროება (ზეწოლა). ირანს მოლაპარაკება სურს.“
ტრამპმა განაცხადა, რომ შეხვედრა მზადდება, თუმცა გააფრთხილა, რომ ადგილზე არსებულმა მოვლენებმა შესაძლოა აშშ აიძულოს იმოქმედოს მანამ, სანამ რაიმე შეხვედრა შედგება.
„ჩვენ შეიძლება შევხვდეთ მათ,“ - თქვა მან.
„ანუ, შეხვედრა მზადდება, მაგრამ მომხდარის გამო, შესაძლოა შეხვედრამდე მოგვიწიოს მოქმედება. თუმცა შეხვედრა მზადდება. ირანმა დარეკა. მათ მოლაპარაკება სურთ.“
ირანში დეკემბრის ბოლოდან მოყოლებული საპროტესტო აქციები მიმდინარეობს, რაც ეროვნული ვალუტის მკვეთრმა გაუფასურებამ და გაუარესებულმა ეკონომიკურმა პირობებმა გამოიწვია.
ტრამპმა აღნიშნა, რომ მისი ადმინისტრაცია ყურადღებით აკვირდება ირანში არსებულ ვითარებას და განიხილავს „ძალიან მკაცრ ვარიანტებს“, რადგან საპროტესტო აქციების დროს გავრცელებული ინფორმაციით, მსხვერპლის რაოდენობა კვლავ იზრდება.
„სამხედრო ძალები ამ საკითხს სწავლობენ და ჩვენ ზოგიერთ ძალიან მკაცრ ვარიანტს განვიხილავთ. გადაწყვეტილებას მივიღებთ,“ - განაცხადა მან.
