სახელმწიფო ტელევიზიის ცნობით, ირანში მეხანძრეები ორშაბათს გაჩენილ ძლიერ ხანძრებს ებრძვიან, რომელიც ქვეყნის უდიდეს სავაჭრო პორტში მომხდარი მასშტაბური აფეთქების შემდეგ გაჩნდა, რასაც 46 ადამიანი ემსხვერპლა.
აფეთქება შაბათს, ირანის სამხრეთით, სტრატეგიულ ჰორმუზის სრუტესთან ახლოს მდებარე შაჰიდ რაჯაის პორტში მოხდა, სადაც გლობალური ნავთობწარმოების მეხუთედი გადის.
ოფიციალურმა საინფორმაციო სააგენტო IRNA-მ, ჰორმუზგანის პროვინციის კრიზისების მართვის დირექტორის, მეჰრდად ჰასანზადეს განცხადებაზე დაყრდნობით, გაავრცელა ინფორმაცია, რომ „შაჰიდ რაჯაის პორტში ხანძრის შედეგად დაღუპულთა რიცხვმა 46-ს მიაღწია“.
ოფიციალურმა პირებმა მანამდე 1000-ზე მეტი ადამიანის დაშავების შესახებ განაცხადეს, თუმცა ჰასანზადემ თქვა, რომ მათი უმეტესობა მკურნალობის შემდეგ გაწერეს. მან დასძინა, რომ მხოლოდ „138 დაშავებული რჩება საავადმყოფოში“.
ირანის წითელი ნახევარმთვარის მიერ გავრცელებულ კადრებში ჩანს, როგორ გრძელდება ხანძრის კერის ერთ ნაწილში დაბალ ალზე ნახშირივით შავი, სქელი კვამლის ამოსვლა და როგორ დაფრინავს ტერიტორიის თავზე სახანძრო-სამაშველო ვერტმფრენი.
აფეთქების მიზეზი ჯერჯერობით უცნობია, თუმცა პორტის საბაჟო სამსახურმა განაცხადა, რომ ის შესაძლოა გამოწვეული ყოფილიყო სახიფათო და ქიმიური ნივთიერებების შესანახ ზონაში გაჩენილი ხანძრისგან. ირანის სულიერმა ლიდერმა ალი ხამენეიმ ინციდენტში „რაიმე სახის დაუდევრობის ან განზრახვის“ არსებობის დასადგენად გამოძიების დაწყების ბრძანება გასცა.
ადამიანები სიცოცხლის გადასარჩენად გაიქცნენ
სოციალურ ქსელებში გავრცელებული უსაფრთხოების კამერების ჩანაწერები აჩვენებს, რომ ინციდენტი ნელ-ნელა დაიწყო მცირე ცეცხლითა და ნარინჯისფერ-ყავისფერი კვამლით, რასაც შემდეგ ცეცხლოვანი ბურთის აფეთქება მოჰყვა. კადრებში ჩანს, რომ მცირე ცეცხლი გაჩნდა საწყობის მოპირდაპირედ, გარეთ დაწყობილ რამდენიმე კონტეინერს შორის.
ახლომახლო ადამიანები დადიოდნენ, როდესაც მცირე ზომის ამწე კვამლიან ზონასთან ახლოს გადიოდა. მცირე ცეცხლისა და კვამლის გამოჩენიდან დაახლოებით ერთი წუთისა და რვა წამის შემდეგ, იმ დროს, როდესაც მანქანები ახლოს მოძრაობდნენ, ცეცხლოვანი ბურთი აფეთქდა.
პრეზიდენტმა მასუდ ფეზეშქიანმა კვირას ახლომდებარე ქალაქ ბანდარ-აბასში საავადმყოფოები მოინახულა, სადაც დაშავებულებს მკურნალობენ. აფეთქების შემდეგ ხელისუფლებამ რეგიონში ყველა სკოლისა და ოფისის დახურვის ბრძანება გასცა და მოსახლეობას ურჩია, „შემდგომ შეტყობინებამდე“ არ გავიდნენ გარეთ და გამოიყენონ დამცავი ნიღბები.
თავდაცვის სამინისტროს პრესსპიკერმა, რეზა თალაეი-ნიკმა, სახელმწიფო ტელევიზიისთვის მიცემულ განცხადებაში თქვა: „რეგიონში არ არის სამხედრო საწვავი ან სამხედრო დანიშნულებისთვის იმპორტირებული ან ექსპორტირებული რაიმე ტვირთი“. რუსეთმა ხანძრებთან ბრძოლაში დასახმარებლად ექსპერტები გაგზავნა.
ხელისუფლებამ ორშაბათი ეროვნული გლოვის დღედ გამოაცხადა, ხოლო ჰორმუზგანის პროვინციაში, სადაც პორტი მდებარეობს, კვირას სამდღიანი გლოვა დაიწყო. აფეთქება იმ დროს მოხდა, როდესაც ირანისა და აშშ-ის დელეგაციები ომანში თეირანის ბირთვულ პროგრამაზე მაღალი დონის მოლაპარაკებებს მართავდნენ და ორივე მხარემ პროგრესის შესახებ განაცხადა.
