სამხრეთ კაროლინის გუბერნატორმა ჰენრი მაკმასტერმა გარდაცვლილი რესპუბლიკელი სენატორის, ლინდსი გრემის უმცროსი და სენატში გრემის უფლებამოსილების ვადის შესავსებად დანიშნა. ეს დანიშვნა განხორციელდა რამდენიმე საათის შემდეგ მას მერე, რაც აშშ-ის პრეზიდენტმა დონალდ ტრამპმა საჯაროდ მოუწოდა მაკმასტერს გრემის არჩევისკენ.

დარლინ გრემ ნორდონი აშშ-ის სენატში იმუშავებს იანვრამდე, როდესაც იწურება ლინდსი გრემის უფლებამოსილების ვადა, რომელიც გასულ უქმეებზე 71 წლის ასაკში მოულოდნელად გარდაიცვალა.

მაკმასტერმა ორშაბათს დანიშვნის შესახებ გამოცხადებისას თქვა: „ჩემთვის პატივია, ვთხოვო გრემის უმცროს დას, დარლინ გრემს, ახლა მისი ძმის სახელით დაასრულოს საქმე“.

დარლინ გრემ ნორდონმა კი აღნიშნა: „ლინდსი ყოველთვის ჩემს გვერდით იყო, ახლა კი მე ვიქნები მის გვერდით. ჩემი ძმა საუკეთესო ადამიანი, არაჩვეულებრივი ლიდერი და ნამდვილად კარგი კაცი იყო“.

ტრამპმა მანამდე ამ თანამდებობაზე დარლინ გრემი შესთავაზა და Truth Social პლატფორმაზე გამოქვეყნებულ პოსტში ეს დანიშვნა გრემისადმი „პატივისცემის შესანიშნავ გამოხატულებად“ შეაფასა.

მაკმასტერმა X-ზე გაკეთებულ განცხადებაში აღნიშნა: „დღეს ჩემთვის პატივია დარლინ გრემის დანიშვნა მისი ძმის უფლებამოსილების ვადის დასასრულებლად და მისი სამსახურის მემკვიდრეობის გასაგრძელებლად“.

ლინდსი გრემი, რომელიც არასდროს ყოფილა დაქორწინებული და არ ჰყოლია შვილები, დასთან განსაკუთრებით ახლოს იყო.

გრემის დედა გარდაიცვალა, როდესაც ის 20 წლის იყო, ნორდონი კი - 12-ის. ამ შემთხვევიდან თითქმის ორი წლის შემდეგ მათი მამა გულის შეტევით გარდაიცვალა.

მაშინ 22 წლის გრემმა ოფიციალურად იშვილა თავისი 13 წლის და, რათა მას სკოლა დაემთავრებინა და იგი ძირითადად თავად გაზარდა.

ვარაუდობენ, რომ დარლინ გრემის დანიშვნა დროებითი იქნება.

სამხრეთ კაროლინელი რესპუბლიკელები 11 აგვისტოს სპეციალურ პრაიმერისს გამართავენ ნოემბრის არჩევნებისთვის კანდიდატის შესარჩევად. გამარჯვებული კანდიდატი სენატში ექვსწლიან მუშაობას იანვარში დაიწყებს.