კოლუმბიის პრეზიდენტმა გუსტავო პეტრომ განაცხადა, რომ აშშ, ნარკოტიკებთან ბრძოლის საბაბით, მის ქვეყანას ნარკოტრაფიკში ადანაშაულებს და ემუქრება.
პეტრო ხუთშაბათს გამოეხმაურა აშშ-ის პრეზიდენტ დონალდ ტრამპის მიერ კოლუმბიის წინააღმდეგ გაკეთებულ განცხადებებს და დაიცვა თავისი ქვეყანა იმ ბრალდებებისგან, თითქოს ის ნარკოტიკების კონტრაბანდას არ ებრძვის.
კოლუმბიის ლიდერმა აღნიშნა, რომ მიუხედავად იმ დანაკარგისა, რაც კოლუმბიელებმა წლების განმავლობაში მიმდინარე ნარკოომში განიცადეს, ქვეყანას მაინც ემუქრებიან, ხოლო კრიტიკოსები ამტკიცებენ, რომ კოლუმბია ნარკოტრაფიკს არ ებრძვის. სამხედრო მოსამსახურეებისადმი მიმართვისას მან განაცხადა: „მთავარსარდლის ბრძანება ასეთია: ჩვენს სუვერენიტეტს სიცოცხლის ფასად დავიცავთ. კოლუმბიის დაშინება შეუძლებელია. ისინი, ვინც ამ მუქარას სისრულეში მოიყვანენ, კოლუმბიელ ხალხში მძინარე იაგუარს გააღვიძებენ.“
პეტრომ გააკრიტიკა ნარკოორგანიზაციებთან ბრძოლის საბაბით კარიბის ზღვის აუზში მიმდინარე აშშ-ის ოპერაციები და განაცხადა, რომ ეს „მათ ამცირებს და კოლუმბიელი ხალხი ამის გამო იტანჯება“.
პეტრომ მანამდე ტრამპი ნარკოტიკების მწარმოებელი ლაბორატორიების განადგურებისკენ მიმართული ძალისხმევის სანახავად მიიწვია და აღნიშნა, რომ სამართალდამცველები ყოველ 40 წუთში ერთ ლაბორატორიას ანადგურებენ.
სამშაბათს ტრამპმა განაცხადა: „კოლუმბია, კოლუმბიის სახელმწიფო კოკაინს აწარმოებს. ნებისმიერი, ვინც ამას აკეთებს და ჩვენს ქვეყანაში ყიდის, შეიძლება თავდასხმის სამიზნე გახდეს“.
აშშ, რომელმაც ბოლო თვეებში ლათინურ ამერიკაში სამხედრო ოპერაციები საზღვაო ქვეითების, სამხედრო გემების, გამანადგურებლების, ბომბდამშენების, წყალქვეშა ნავებისა და უპილოტო საფრენი აპარატების განთავსებით გააფართოვა, აცხადებს, რომ მათი მიზანი ნარკოტრაფიკთან ბრძოლაა და სამიზნეს „ნარკოტერორისტული“ ორგანიზაციები და მათი ნავები წარმოადგენენ.
