ჰილარი კლინტონმა აშშ-ის პრეზიდენტ დონალდ ტრამპის ადმინისტრაცია ეპშტეინის ფაილების „მიჩქმალვაში“ დაადანაშაულა. BBC-ის ცნობით, ბერლინში გამართულ ყოველწლიურ მსოფლიო ფორუმზე აშშ-ის ყოფილმა სახელმწიფო მდივანმა სამშაბათს განაცხადა: „გაასაჯაროვეთ ფაილები. ისინი პროცესს აფერხებენ“.
სექსუალურ დანაშაულებში მსჯავრდებული ჯეფრი ეპშტეინი, რომელიც არასრულწლოვანი გოგონების ტრეფიკინგის ფედერალური ბრალდებით სასამართლო პროცესს ელოდებოდა, 2019 წელს ნიუ-იორკის ციხეში თვითმკვლელობით გარდაცვლილი იპოვეს.
კლინტონების წყვილი კონგრესის კომიტეტის წინაშე ჩვენებას მისცემს. აშშ-ის ყოფილი პრეზიდენტი ბილ კლინტონი კომიტეტის წინაშე 27 თებერვალს წარდგება, ჰილარი კლინტონი კი — ერთი დღით ადრე.
ბილ კლინტონმა, რომლის სახელიც ფიგურირებს ეპშტეინის საქმეში, განაცხადა, რომ ის ხვდებოდა ეპშტეინს, თუმცა მასთან ყოველგვარი კონტაქტი დაახლოებით ოცი წლის წინ გაწყვიტა.
„დასამალი არაფერია“
ჰილარი კლინტონმა BBC-ისთან ინტერვიუში აღნიშნა: „ჩვენ მივალთ ჩვენების მისაცემად, თუმცა მიგვაჩნია, რომ უმჯობესი იქნება, თუ ეს პროცესი საჯაროდ წარიმართება“.
„მე მხოლოდ სამართლიანობა მსურს“, — განაცხადა კლინტონმა, — „მინდა, ყველას ერთნაირად მოეპყრონ. ჩვენ დასამალი არაფერი გვაქვს. არაერთხელ მოვუწოდეთ ამ ფაილების სრულად გამოქვეყნებისკენ. გვჯერა, რომ მზის შუქი საუკეთესო სადეზინფექციო საშუალებაა“.
როდესაც ტრამპს BBC-ის ინტერვიუში ჰილარი კლინტონის კომენტარების შესახებ ჰკითხეს, მან უპასუხა, რომ თავადაც არაფერი აქვს დასამალი.
„მე გავთავისუფლდი ყოველგვარი ეჭვისგან. ჯეფრი ეპშტეინთან არანაირი კავშირი არ მქონია. მათ რაღაცის პოვნის იმედით ჩაატარეს მოკვლევა, მაგრამ სრულიად საპირისპირო აღმოაჩინეს. ახლა თავადვე ეხვევიან ამაში. ეს მათი პრობლემაა... კლინტონი და მრავალი დემოკრატი ამ პროცესშია ჩართული“, — განაცხადა ტრამპმა.
